கனவுகள் 4 - மனம் படிநிலைகள்

நாம் கனவை உண்மையென்று உணர்கிறோம் ஏனெனில் அது உண்மைதான்... ஆச்சரியம் என்னவெனில், நம் மூளை நாம் விழித்திருக்கும்போது, நாம் வாழ்கின்ற உலகத்தின் அனைத்து உணர்வுகளைப் போலவே, கனவிலும் எந்த வித புலன் உறுப்புகளின் உதவியின்றி உருவாக்குகிறது.

---William Dement

அமெரிக்க எழுத்தாளர், மார்க் ட்வைன், மற்றும் அவர் சகோதரர் ஹென்றி மிசிசிபி ஆற்றங்கரையில் ஆற்றுப்படகுகள் சம்பந்தமான வேலையில்
ஈடுபட்டிருந்தனர். ஒரு நாள் இரவு, மார்க் ட்வைனுக்கு ஒரு கனவு வந்தது. அதில் அவருடைய சகோதரியின் அறையில், அவர் சகோதரரின் உடல் ஒரு உலோக சவப்பெட்டியில் வைக்கப்பட்டிருந்தது. அந்த சவப்பெட்டி இரண்டு நாற்காலிகளின் மேல் வைக்கப்பட்டிருந்தது. அதன் மையத்தில் ஒரு மலர்ச்செண்டும் ஒரு ஒற்றை கிரிம்சன் மலரும் வைக்கப்பட்டிருந்தது. மார்க் டவைன் இக்கனவை பற்றி தன் சகோதரியிடம் கூறினார்.

இரண்டு வாரங்கள் கழித்து, அவருடைய சகோதரர் ஒரு ஆற்றுப் படகில் ஒரு பெரிய வெடிவிபத்தில் இறந்தார். அவருடன் பல பேர் இறந்தனர். அனைவரின் உடலும் மரச் சவப்பெட்டிகளில் புதைக்கப்பட்டன. ஆனால் மார்க்கின் சகோதரி தன் சகோதரர் ஹென்றிக்காக பணம் செலவழித்து ஒரு விலையுயர்ந்த உலோக சவப்பெட்டியை வாங்கியிருந்தார். ஈமச்சடங்கின் போது அச்சவபெட்டியை பார்த்து அதிர்ந்தார். அது அவரின் கனவில் வந்தது போலவே இருந்தது. அவர் ஹென்றியின் பேழைக்கு அருகில் நின்றிருக்கும்போது, ஒரு பெண் ஒரு பூங்கொத்தையும், ஒரு ஒற்றை சிவப்பு ரோஜாவையும் அதன் நடுவில் வைத்தார்.

________________________________ 

நம் மனம் மூன்று நிலைகளால் ஆனது Conscious, Unconscious மற்றும் Subconscious. நாம் பிறந்தது முதல், நாம் பார்க்கும், படிக்கும், கேட்கும், பேசும், உணரும், நினைக்கும் அனைத்து விசயங்களும் நம் மனதில் பதிகின்றன. கிட்டத்தட்ட கணிப்பொறியில் ஆங்காங்கே நோட்பேடில் குறிப்புகள் எழுதி வைப்பது போல. இதில் நாம் பயன்படுத்தாவை, ஒதுக்குபவை, விரும்பாதவை போன்ற விசயங்கள் தானாக ஆழ்மனதுக்கு(அன்கான்ஷியஸ்) செல்கின்றன. நாம் அவ்வப்போது நினைப்பவை சாதாரண(கான்ஷியஸ்) மனதில் இருக்கின்றன. சில சமயம் பல நாட்கள் கழித்து சந்திப்பவரின் பெயரை நாம் ஞாபகப்படுத்த சிரமப்படுகிறோம் அல்லவா? அப்பெயர் பயன்படுத்தாததால் ஆழ்மனதில் உள்ளது. அது கான்ஷியஸ் மனதிற்கு கொண்டு வர நாம் முயற்சிக்கிறோம்.

சப்கான்ஷியஸ் மனது என்பது இரண்டிற்கும் இடைப்பட்ட நிலை. கிட்டதட்ட திரிசங்கு சொர்க்கம் போல!:-) (சில உளவியலாளர்கள் சப்கான்ஷியஸ் என்ற ஒன்றை குறிப்பிடாமல் அதையும் ஆழ்மனதுடனே(அன்கான்ஷியஸ்) ஒப்பிடுவார்கள்). ஒரு சிறு சம்பவம். ஒருவருக்கு காதல் தோல்வி. அவரின் முதல் காதல் அது. மிகவும் ஆழமாக நேசித்தார். காதல் முறிந்துவிட்டது. அவர் தன் காதலியை மறக்க முயற்சிக்கிறார். நாளடைவில் மறக்கிறார். அவருக்கு புது உறவுகள் ஏற்படுகின்றன. திருமணமாகி பற்பல வருடங்கள் பிறகும் அவருக்கு மனைவியுடன் அடிக்கடி சண்டை போடுகிறார். அவர் வேண்டுமென்று சண்டை போடவில்லை. ஆனால் மனைவி செய்யும் ஒவ்வொரு விசயமும் பிடிக்காமல் போகிறது.

நிற்க. இங்கே சப்கான்ஷியஸ் என்ன செய்கிறது. அவர் தன் காதலியை மறந்துவிட்டார். அதாவது காதலி பற்றிய நினைவுகள் சாதாரண மனதிலிருந்து(கான்ஷியஸ்) ஆழ்மனதிற்கு(அன்கான்ஷியஸ்) சென்றுவிட்டது. ஆனால் அது பிடித்தமான ஒன்றை ஆழ்மனதிற்கு தள்ளிவிட்டதால் ஆழ்மனம் அதை ஏற்றுக்கொள்ளவில்லை. சப்கான்ஷியஸ் மனம் இதை சாதாரண மனதிற்கு ஏதோ ஒன்றின் மூலம் இது நீ விரும்பிய வாழ்க்கை அல்ல என்று அவ்வப்போது உணர்த்திக் கொண்டே இருப்பதால், அவருக்கு திருமண உறவில் பிரச்சினை ஏற்படுகிறது.

இன்னும் தெளிவாக சொல்லலாம். Conscious - இது வண்டி ஓட்டுபவரை போல. வண்டி ஓட்டுபவர் வண்டியை கட்டுப்படுத்துவது போல இதுதான் மனம் மற்றும் உடல் இரண்டையும் கட்டுப்படுத்துகிறது. இதுதான் உங்களைச் சுற்றி எல்லா முக்கியமானவைகளையும் செய்கிறது. ஆனால் கான்ஷியஸ் மனம் அப்போதைய சூழ்நிலையை மட்டுமே முக்கியமாக கருதும். அதாவது வண்டி ஓட்டும்போது நீங்கள் உங்களுக்கு பின்னால் சென்ற பாதை பற்றி யோசிக்க போவதில்லை, வரப்போகும் பாதையை பற்றியும் யோசிக்க போவதில்லை, நீங்கள் உங்களுக்கு முன்னால் உள்ள பாதை காண்பீர்கள் உடனடியாக உள்ள தடைகள்/ஆபத்தை மட்டுமே கருத்தில் கொள்வீர்கள். இதைப்போலவே கான்ஷியஸ் மனம் செயல்படுகிறது.

Subconscious - சப்கான்ஷியஸ் மனம் என்பது வண்டியின் எஞ்சின் போல. இது வண்டியின் அனைத்து பாகங்களுக்கும் வேலை செய்ய ஆற்றல் அளிக்கிறது. சப்கான்ஷியஸ் மனம் லாஜிக் இன்றி யோசிக்கும். அது கான்ஷியஸ் மனதிலிருந்து வரும் எல்லா தகவல்களையும் கான்ஷியஸ் மனதிற்கு தெரியாமலேயே உணர்வுகள், அனுபவங்களுடன் சம்பந்தபடுத்தி/செயல்முறைபடுத்தி பார்க்கும். சப்கான்ஷியஸ் மனம் ஒரு மிகப்பெரிய கலைடாஸ்கோப் போன்றது. அதில் வரும் நிறங்களும் வடிவங்களும் வரிசையற்ற முறையில் மாறிக் கொண்டே இருக்கும். அதுபோல இதன் எண்ணங்களும்.

அடுத்த பதிவில் இதை இன்னும் புரிந்துகொள்வதற்காக ஒரு எளிதான ஆய்வு செய்வோம்.

________________________

கனவு மேலும் சில சுவாரசியங்கள்:

நம்மால் நமக்கு தெரிந்ததை மட்டுமே கனவு காண முடியும். நீங்கள் பார்க்காத அமெரிக்க வீடு உங்கள் கனவில் வரவே வராது. மேலும் கனவில் வரும் நபர்கள் அனைவரையும் நீங்கள் வாழ்வில் ஒருமுறையாவது பார்த்திருப்பீர்கள். உங்களுக்கு நினைவில் இல்லாமல் இருக்கலாம் அவ்வளவே. நாம் சாலையில் செல்லும் எதேச்சையாக ஒரிரு வினாடி பார்க்கும் ஒரு சிறுமி கூட நம் வாழ்வில் ஏதாவது ஒரு கனவில் வரக்கூடும். கனவுகளில் வருவது உண்மையாக நமக்கு உணர்த்தப்படுவதில்லை. கனவுகள் என்பவை உருவகங்களே. அவற்றின் மூலம் நம் மனம் அதைப் போல் வேறு எதையோ  உணர்த்துகிறது.


12% மக்கள் முழுமையாக வெறும் கருப்பு வெள்ளையில் மட்டுமே கனவுகளை காண்கிறார்கள். மீதி பேர் நல்ல நிறங்களிலோ மங்கலான நிறங்களிலோ கனவு காண்கிறார்கள். கனவில் வரும் சம்பவங்கள் பெரும்பாலும் நம் அன்றாட வாழ்வின் சம்பவங்களாகவே இருக்கும்.
நீங்கள் விழித்த 5 நிமிடங்களில் பாதி கனவை மறந்து விடுகிறீர்கள். 10 நிமிடங்களில் 90%ஐ மறந்துவிடுவீர்கள். மீதி மட்டுமே ஞாபகத்தில் இருக்கும்.